Cúram míochaine agus fóiréinseach

Tharlódh go mbeadh drogall ort dul go dtí an dochtúir tar éis ionsaí gnéis ach tá cúiseanna maithe ann lena dhéanamh.

D’fhéadfadh gortuithe a bheith ag baint duit ar an taobh istigh nó ar an taobh amuigh agus bheadh cóir leighis ag teastáil lena n-aghaidh.

Ní mór tástáil a dhéanamh le fáil amach an bhfuil galar gnéas-tarchurtha ort.

D’fhéadfá a bheith ag iompar clainne agus chaithfeadh do chuid roghanna a bheith ar eolas agat.

D’fhéadfá a bheith ag iarraidh fianaise a bhailiú sa chás go gcinnfeá ar an éigniú nó ionsaí gnéis a thuairisciú. D’fhéadfadh scrúdú míochaine agus fóiréinseach a bheith ina chuid den tuairisciú.

Má tá an t-ionsaí díreach tar éis tarlú agus tú ag dul le haghaidh scrúdú míochaine agus fóiréinseach, cuimhnigh:

Ná nigh thú féin roimh ré.

Má ionsaíodh thú sa bhéal, ná hith dada, na hól dada, ná caith tabac agus ná húsáid taos fiacla ná folcadh béil go mbeidh samplaí tógtha ó do bhéal agus ón gcuid de d’aghaidh timpeall air.

Ná tóg drugaí ná alcól roimh ré.

Ná nigh na héadaí a bhí tú a chaitheamh nuair a tharla an t-ionsaí. Tabhair leat iad má d’athraigh tú do chuid éadaí, nó tabhair athrú éadaí leat mar go bhféadfaí na héadaí a bhí ort nuair a tharla an t-ionsaí a choinneáil le haghaidh a scrúdaithe nó mar fhianaise.

D’fhéadfadh tacaíocht a bheith uait agus tú ag dul le haghaidh cabhair mhíochaine. D’fhéadfá iarraidh ar chara nó ar ghaol leat a dhul in éineacht leat, nó téigh i dteagmháil leis an Ionad Ghéarchéim Éignithe is gaire duit agus rachaidh comhalta foirne in éineacht leat.

Cén duine ar chóir dom a dhul chuige/chuici?

D’fhéadfá a bheith ag iarraidh dul chuig do dhochtúir teaghlaigh féin. Ach, má thuairiscíonn tú an t-ionsaí chuig na póilíní, nó má tá tú ag smaoineamh air, tá seans ann go mbeidh ar an dochtúir nó ar an altra a rinne an scrúdú ort an fhianaise mhíochaine agus fhóiréinseach a thabhairt sa chúirt agus b’fhearr go mbeadh sé/sí sainoilte chun é sin a dhéanamh agus go mbeadh taithí aige/aici ar a leithéid a dhéanamh.

Is féidir le d’Ionad Ghéarchéim Éignithe áitiúil thú a chur ar an eolas maidir leis an ionad nó dochtúir is gaire duit atá sainoilte chun scrúduithe míochaine agus fóiréinseacha a dhéanamh. Is éard a bheidh ann:

Aonad Cóireála um Ionsaí Gnéis má tharla an t-ionsaí i bPoblacht na hÉireann,

Aonad Coireachta PSNI um Éigniú má tharla an t-ionsaí i dTuaisceart Éireann. De ghnáth thabharfadh an tAonad Coireachta PSNI um Éigniú go dtí an tSraith Seomraí um Éigniú is gaire le haghaidh scrúdú míochaine agus fóiréinseach,

Dochtúir a bhfuil taithí aige/aici, mura bhfuil ACIG ná Sraith Seomraí PSNI um Éigniú ar fáil.

Scrúdú fóiréinseach

I scrúdú fóiréinseach, bailíonn dochtúir nó altra sainoilte fianaise ó do cholainn is féidir a úsáid chun an duine a d’ionsaigh thú a ionchúiseamh. Bíonn dochtúirí agus altraí in Aonaid Chóireála um Ionsaí Gnéis agus i Sraitheanna Seomraí um Éigniú oilte chun an fhianaise fhóiréinseach a bhailiú agus chun an fhianaise sin a thabhairt sa chúirt, más gá.

Déanfaidh an dochtúir nó an t-altra scrúdú ort freisin lena chinntiú go bhfuil tú ceart go leor. Má bhíonn aon ghortú ort a dteastaíonn cóiríocht mhíochaine uait láithreach lena aghaidh, tabharfar an chóiríocht sin duit roimh an scrúdú fóiréinseach. Más mian leat, beidh comhalta foirne ón Ionad Ghéarchéim Éignithe in éineacht leat i gcaitheamh an scrúdaithe.