I gcás contúirte, tionscnaíonn ár gcóras cosanta sruth aidréanailín a chabhraíonn linn a bheith ar an airdeall agus troid nó teitheadh. Tagann tráma i gceist nuair a bhímid thar ár riocht agus nach mbímid in ann troid ná teitheadh. Is féidir leis sin athruithe trámacha a thioscnamh sa cholainn agus san intinn.

Dícheangal

D’fhéadfá iarracht a dhéanamh an chuimhne a chur i gceilt trína bheith ag tógáil drugaí nó ag ól an iomarca. Le aghaidh go leor daoine, is gnáthshlí é sin le dul i ngleic leis an tráma agus cabhraíonn sé leo sa ghearrthéarma. Ach tá sé tábhachtach a thuiscint gur féidir leis an réiteach gearrthréimhseach sin níos mó fadhbanna a chruthú san fhadtéarma. Mura bhfuil tú in ann stopadh, tá tacaíocht ar fáil le cabhrú leat.

A bheith ar an airdeall go síoraí. Ceapann tú go mbeidh contúirt ann am ar bith. Mar thoradh air sin, d’fhéadfadh go mbainfí geit asat go héasca, go gcuirfeadh rudaí beaga cantal ort, nach mbeifeá in ann codladh ná ithe i gceart, nó go mbeadh eagla agus imní ollmhór ort.

Spléachtaí siar agus tromluithe D’fhéadfadh nach mbeifeá in ann dearmad a dhéanamh ar an eachtra thrámach, go háirithe sa ghearrthéarma. Blianta ina dhiaidh, is féidir leis an eachtra teacht ar ais chun do chuimhne. Is féidir le spléachadh siar a bheith an-bheo agus an-sonrach, ach fós d’fhéadfadh sé a bheith deacair a chur in iúl i bhfocail céard a tharla.

Tú féin a chur i gcontúirt d’aon ghnó. D’fhéadfá tú féin a chur i gcontúirt d’aon ghnó lena chruthú duit féin, mar shampla, nach bhfuil an t-éigniú ag dul i bhfeidhm ort.

Éifeachtaí fadtréimhseacha

D’fhéadfá a bheith ag mothú ciontach, d’fhéadfadh náire a bheith ort, d’fhéadfadh fonn féindíobhála nó féinmharaithe a bheith ort, nó d’fhéadfá a bheith tugtha d’alcól nó do dhrugaí eile. D’fhéadfadh meabhairghlar teacht ort de thoradh an tráma. Is féidir leis sin tionchar a imirt ar an gcaoi a gceapann tú ba chóir do dhaoine caitheamh leat agus ar an gcaoi a bpléann tú le daoine eile. Má insíonn tú do scéal agus má chreidtear thú, is féidir leis cabhair mhór a thabhairt duit ó thaobh cumhacht agus smacht ar do shaol a fháil ar ais agus an luach a chuireann tú ort féin a ardú.

Do cholainn

D’fhéadfadh gur tháinig neamhord itheacháin, andúil nó tinneas fisiceach eile ort atá ceangailte lenar tharla. Más deacair leat breathnú ar do cholainn agus éisteacht leis na teachtaireachtaí a thugann sí duit, is féidir le tacaíocht agus le comhairleoireacht an-chabhair a thabhairt duit le déileáil leis sin.

Do chuid mothúchán

D’fhéadfadh gur thug tú neamhaird ar do chuid mothúchán nó ar phian fhisiceach le go mbeifeá in ann teacht tríd an bhforéigean gnéasach. Chabhraigh sé leat a bheith gan mhothú – thug sé tríd an tráma thú. B’fhéidir go bhfuil tú á úsáid le teacht tríd an saol ó shin. B’fhéidir go bhfuil sé róscanrúil an fhearg, an eagla, an bhuairt agus an brón nach raibh tú in ann a mhothú ansin a mhothú anois. D’fhéadfadh go bhfágfadh sé sin nach bhfuil tú in ann na dea-mothúcháin a mhothú ach an oiread nó nach bhfuil tú in ann idirdhealú a dhéanamh eatarthu. Is féidir teacht chugat féin agus raon iomlán mothúchán a bheith agat.

Dlúthchaidreamh

Má bhí caidreamh agat leis an duine a bhain mí-úsáid asat agus má chuir tú muinín ann/inti, ó bheith ag caint leis/léi nó toisc gur gaol leat é/í, d’fhéadfadh gur deacair leat muinín a chur in aon duine anois, dlúthchairde a bheith agat nó caidreamh a bheith agat atá sláintiúil agus nach bhfuil mí-úsáid ag baint leis. Is féidir leat na mothúcháin sin a athrú le himeacht aimsire de réir mar a fhaigheann tú smacht arís ar do shaol. Féadann tacaíocht ó chara nó ó chomhairleoir an-chabhair a thabhairt duit.

Gnéasacht

Le himeacht aimsire, is féidir leat foghlaim cén chaoi le do chuid riachtanas a aithint agus le haire a thabhairt duit féin. Is féidir leat foghlaim cén chaoi le caidreamh gnéasach sábháilte agus taitneamhach a thógáil agus oibriú tríd an náire a d’fhéadfadh a bheith ort le fada.